Sinopsis
A la contra de tantes distopíes narratives y cinematográfiques a les que tamos avezaos, qu’anticipen futuros inquietantes, 1929 ye una ficción especulativa que se proxecta hacia’l pasáu pa construyir, nun relatu ucrónicu y non menos inquietante, toa una riestra d’acontecimientos históricos que nun asocedieron pero qu’igual pudieron asoceder. Dibúxanos una Asturies qu’a lo llargo del sieglu xix vive xuncida al xugu del Reinu Xuníu y onde españa una revolución lliberadora al entamu del sieglu xx. Tensión y pasión, resistencia y llucha, mansedume y heroísmu, alternen nesta novela que caltién ensin desmayu’l pulsu narrativu del empiezu al cabu.
«La voz del comisariu xeneral apagóse entoncies, como si la señardá torgare a aquel home de siguir falando. Sofitáu na ventana, miraba al infinitu, ayenu pel momentu a les custiones del presente. Enzarráu como taba nos sos recuerdos, dexó de prestar atención a la periodista, qu’esperaba impaciente a que recobrare la conciencia. El so cuerpu taba nel despachu, pero l’ánima taba en Mieres, taba na cárcel d’Uviéu, taba nos campos galeses a los que munchos foron unviaos xunto colos rebalbos irlandeses; en fin, taba nel pasáu, naquellos díes de la primavera de 1916 que tan cercanos me paecíen a min pero que tan llonxanos quedaben pa les persones que m’arrodiaben».
Más libros del autor
